Туғил, чўқин ва ўлгин — Ҳаммасига пул бергин. (Рус мақоли)
Ютербог шаҳри барвақт уйғонади. Ҳали тонг ёришгани йўқ, аммо бўёқхонадаги қозонлар аллақачон қайнаяпти, турли рангдаги суюқликлар қулқуллайди, улардан кўтарилган буғ очиқ деразалардан кўчага чиқяпти.
Ташландиқ харобазорда тўрт арқончи ишлаяпти. Катта ёғоч ғилдирак ғирчиллаб айланиб, каноп толаси буралиб пишиқ арқон бўляпти.
Булкачилар аллақачон уйғонишган. Улар қоронғидаёқ иштаҳани қитиқлайдиган молларини тайёрлаб, энди овозларини баралла қўйиб харидор чақиришяпти.